Integra Construction және GLB-мен бірлесіп Солтүстік Қазақстан облысында инфрақұрылымды қалпына келтіру жобасы бойынша бір қабатты 300 тұрғын үй салады, жоба Петропавлдағы су тасқынынан зардап шеккендерді қолдау мақсатында іске асырылатын болады.
"Құрылыс кезінде GLB үй құрылысы комбинаты шығаратын үш қабатты панельдер пайдаланылатын болады. Олардың артықшылығы, біріншіден, сапа. Панельдер жылуды сақтайды және жоғары шу оқшаулауына ие. Екіншіден, монтаждау жұмыстарының жылдамдығы бірнеше есе артады.
Үйлер конструктор сияқты дайын бөлшектерден жиналады. Бұл су тасқынынан зардап шеккендер үшін Солнечный – 2 шағын ауданында қысқа мерзімде тұрғын үй салуға мүмкіндік береді", - деді Integra Construction KZ бас директоры Данияр Рахимтаев.
"Қазір құрылыс алаңында дайындық жұмыстары жүргізілуде, соның ішінде қызметкерлер мен техниканы жұмылдыру", - деді ол.
Айта кетейік, құрылыс басталар алдында Солтүстік Қазақстан облысының әкімі Гауез Нұрмұхамбетов Астанадағы GLB зауытына барып, панельдерді дайындаудың технологиялық процесімен және дайын өнімнің сапасымен жеке танысты.
Жобаны қаржыландыру "Kaspi" АҚ қаражаты есебінен қамтамасыз етіледі.
Фото көзі: sko_kz; компания мұрағаты
